टूट पड़ी विपदा म्हारे पै इक दिन बैठे ठाल्ले |
जद अपनी अनपढ़ धन्नो ने हम फिलम दिखावन चाल्ले |
एतबार का दिन था यारो, म्हारी धन्नो हमते रूसी |
अरे निकोडे ब्याह रचा क्यूं तणे जेल में ठूसी |
म्हारी पड़ोसन रोज करे सै मिल के काणा फूसी,
आज दिखा दे मणे सलीमा छोड़ जणे कंजूसी |
इतना बस का कोन्या तो खुरपे तै नाक कटा ले,
अपनी .................
बात बेतुकी सुणके बोल्या, ओ राजू की मम्मी
ऊंट पटांग बके मत ना, यो से बात निकम्मी |
स्याणे होगे छोरा-छोरी, राजू-गुड्डी-पम्मी,
फिलम-बिलम में के राख्या सै, घर में चूस मुसम्मी |
पिक्चर के पीसा की तू बरफी और कचोडी खा ले,
अपनी................
तान्ने देण लगी हमने, म्हारी मेम चढ़ा के त्योरी,
ना चाहिए मणे तेरी मुसम्मी, बरफी और कचोडी |
आज दिखा दे मणे सलीमा, मत बात बनावे कोरी,
चालूंगी में साथ बनाके, जूड्डा डबल सटोरी |
अर् छोरा छोरी पड़े रह्वेंगे घर में राम हवाले,
अपनी............
करके जूड्डा लिकड़ी धन्नो, जणे बिजली कड़की,
चाल्ली म्हारे साथ बनाके रोटी दूणू खटकी |
बस में चढ़ता सिर टकराया, धन्नो म्हारी भडकी,
अर् जूड्डे मैं ते लिकड़ पड़ी वा, मोटी गेंद रबड़ की
बोल्ली धन्नो, राजू की वा गेंद निपूते ठा ले,
अपनी..........
पहुंचे लेट सलीमा घर में, खा के चक्कर-फेरा
अर् कटा टिकट फिर बालकनी का, चाल्ले करण बसेरा |
बोल्ली धन्नो देख हाल के भित्तर घुप्प अँधेरा
जणे सलीमा घर से है अर् या भुत्तों का डेरा |
मेरा कालजा पाट्या जा से पाणी तू मंगवा ले,
अपनी.....
सास बहु था नाम फिलम का, बेटा था खटरागी
बहु बिचारी सिद्धि साधी, सास धाप की नागी
बहुअड़ का जद पकड़ चोटला सासण खींचण लागी
तो सीट छोड़ कर म्हारी धन्नो उन्हें छुटावण भाजी |
लटपट लटपट गिरी हाल में, पड़े जान के लाले,
अपनी............
धरिया रह ग्या खेल तमाशा, लिकड़ी सारी शेखी
कर के टैक्सी सड़क एकदम अस्पताल की देखी
एक टांग पर चढ्या पलस्तर, हुई ड्रेसिंग माथे की
पड़े पड़े म्हारी धन्नो ने खाट महीनों सेकी |
बोल्ली फिलम कदे न देखूं, चाहे वचन भराले
अपनी...
{ आनंद वर्मा }
# # # #
No comments:
Post a Comment